صعوبة في الخلفة
مساء الخير
انا وزوجي عندنا صعوبة في الخلفة انا بخلف وهو بيخلف لكن مع بعض صعب يحصل خلفة جربنا كل الحلول ومعظم العلاجات وعملت اكتر من عملية وكان اخره كل ده فشل
المهم من فترة قصيرة قالي انه عايز يتجوز انا اتصدمت ومدخلتش معاه في نقاش او مهاترات في الموضوع وسيبت البيت ومشيت لأني حسيت اني قفلت منه ونفسيتي مش متقبلاه وخلاص قررت انهي الموضوع
جالي عند بابا وحاول انه يرجعني باللين وبالقوة لأن الراجل ده المفروض اني بيني وبينه حب 11 سنة وعمل اللي ميتعملش عشان اتجوزه لكن انا رفضت لأني عارفاه مبيرجعش في قراراته
و انا من حقي انا كمان اخلف لأني مفيش عندي مشكلة اصلًا
و قولتله كده لقيته اتهبل وضربني وازاي اقول اني عايزة اتجوز واخلف انا كمان وحرفيًا خدني من شعري من بيت بابا لشقتنا
و دماغي ضربت في عربيته وهو بيدخلني واتعورت ومتهزش والله العظيم ولا كأني بني ادم بينزف انا بحكي عشان اقول ان انا لا ست وحشه ولا بتبلي عليه ولا بتدلع ومش عايزاه يخلف
المهم صممت علي الطلاق لقيته بيقولي
اتطلقي وانا هسجن ابوكي الموضوع عادي
بابا حصله مشكله في تجارته من فترة وبابا والله ما طلب منه حاجة هو اللي صمم يساعده بفلوس خصوصًا انهم في نفس المجال ويعرف ابويا قبل ما يعرفني اصلًا ووالدي حلف انه يكتب وصلات بالمبلغ وحصل فعلًا المشكلة ان لسه بابا بيقوم علي رجله واكيد مش معاه المبلغ ده دلوقتي
الموضوع مقفول في وشي وهو لما لقاني سلمت بدأ يمشي في موضوع الجواز زي ما كنت متوقعة
شوروا عليا بالله عليكم
